Coordenadas Celestes

	Sign In Sign-Up

INTRODUCCIÓN á ASTRONOMÍA de POSICIÓN Seminario Permanente do IES de Porto do Son, IES Campo de S.Alberto e IES Ramón Cabanillas

Coordenadas Celestes

Tendo en conta a necesidade de situar dunha maneira precisa as diferentes estrelas e demáis obxectos de ceo profundo para proceder ó seu estudio do xeito máis sistematizado posible xurde a necesidade de establecer unha serie de Coordenadas Celestes de carácter universal.

Entre as máis usadas podemos destacar as seguintes :

Coordenadas Horizontais ou Altazimutais

A Altitude, que corresponde á altura do astro (medida en graos) sobre o horizonte. Varía dende 0º ata 90º, sendo estes valores positivos para os astros situados por encima do horizonte e negativo en sentido contrario
O Azimut, que corresponde co arco do horizonte medido en sentido retrógado a partir do Sur ata á vertical do astro. O seu valor varía de 0º ata 360º

Coordenadas Ecuatoriais

A Declinación, definida como o arco do meridiano no que se sitúa o astro comprendido entre o ecuador celeste e o centro do astro. A declinación varía de 0º a 90º positivos cando o astro está situado no hemisferio norte ou boreal e de 0º a 90º negativos cando está no hemisferio sur ou austral
A Ascensión Recta, que representa o arco do ecuador celeste medido en sentido directo1 dende o punto Aries ou Vernal ata o meridiano que contén ó astro. O seu valor varía de 0 a 24 horas

O propio movemento terrestre arredor do Sol é o responsable da sucesión do ciclo Día-Noite e do transcurso das Estacións ó longo do Ano. Precisamente, dende antiguo usáronse estes feitos e outros relacionados co movemento dos astros para establece-los principais calendarios. Está claro que unha medida inmediata do tempo fai referencia ó mencionado ciclo Día-Noite, que, por conveniencia, representa un período de 24 horas. O establecemento dos Meses relacionouse, nun primeiro momento, coa repetición das distintas fases luares, ainda que, na actualidade, non se corresponden exactamente con estas repeticións, atendendo ás necesidades xurdidas ó confeccionar o noso calendario. A Semana está en relación coas Fases da Lúa. Finalmente o Ano representa o tempo que tarda a Terra en dar unha volta completa arredor do Sol.